今年我已24歲了，於得生團契成功戒毒後，現以導師身份協助濫藥的青少年戒毒。
在我讀中一那年暑假，我開始嘗試第一次毒品。其實起初我堅決反對，因為我害怕上癮，可是其他朋友卻對毒品充滿好奇心，最後自己因害怕被朋友取笑、排斥，於是便嘗試。我記得第一次吸毒係食丸仔，當我食了丸仔之後的感覺回想起也顫抖。當藥力到的時候眼看的事物變得天旋地轉，不斷嘔吐、頭暈、全身乏力。當時自己仲係求學階段，但自己不但冇顧及成績，相反食丸仔的領域仲伸延到校內，每日返學只顧睡覺，完全沒有進取的心、做事得過且過，令到老師對自己的印象都唔係太好。呢D日子持續了好耐，當食丸仔帶來的感覺開始對自己冇作用的時候，就開始吸食白粉。起初吸食白粉同食丸仔的感覺一樣，但係萬料不到當自己停止吸食白粉時，身體產生了唔尋常的變化，不停咁打瞌睡、口水鼻涕不停流出，身體發冷發熱，身上每一個關節好似被萬千的針拮一樣。原來自己不知不覺已經上了癮；而身邊的朋友更開始將白粉注射人身體，務求以最快的方法達到興奮；但其後佢地都因注射過量藥物而相繼逝去。

記：咁你屋企人知唔知道你吸毒？
S :起初家人都不意為然，直至自己犯了官司，被法官判守感化令才被揭破。

記：咁你有無諗過要戒？
S ：在守感化令其間自己都有繼續吸食，但當感化官告訴自己再吸食的話就帶我上庭，自己當時很害怕上庭，所以就決心戒掉。而且當人受到約束的時候必然會警惕自己；但當自己守完了感化令，就把之前的教訓忘記得一乾二淨，又過返以前吸毒的生活；同一班吸食毒品的朋友走返埋一齊。最初自己都很有誡締，怕自己再走回頭路，但係人好善忘，日子耐了，好多事情就很快忘記。之後，自己又開始因吸毒的問題同家人爭執，甚至偷家人錢去買毒品。起初都只係偷屋企錢
或者問朋友借，但係日子耐了呢D方法都行唔通。結果走去偷去搶，而且更冇返屋企，同家人的接觸更一度終止了。那時自己同一班販買毒品的朋友一齊，日頭在佢地的屋企吸食白粉，夜晚就同佢地一齊到ｄｉｓｃｏ玩樂，服食搖頭丸、嗦ｋ仔、通宵達旦。呢D日子維持了一個月。

 
  記：咁你點會來到得生？
S ：直到有一天的清晨，一班掃毒的探員闖入寓所內進行掃毒，當時自己都在場，所以被警員一并帶到警署，而在屋內發現很多不同的毒品，自己又未能提出證據去解釋同所發現的毒品冇關，故一并被起訴。當時保釋我的係我家人，所以自己再一次去戒毒。

記：入到來得生有乜感受？點解你會有改變？
S ：經以前的感化官介紹下，自己入了得生團契接受１８個月的戒毒訓練。當時自己毒癮很深、而且仲未戒除，所以自己在村中最初的日子都要痶癮，每日嘔吐、食乜就嘔乜，身體好似被萬千的針拮一樣，痛苦難當，自己連屈斷一枝牙籤的氣力都冇。夜晚睡覺的時候又發冷發熱、抽搐，整整一個月都冇好好睡一覺，但經過呢D漫長的日子，身體明顯比之前好了。在受訓其間仲要不停到警署報到，直至警方正式起訴自己，而且要將自己的案件提到地區法院審理。當時自己簡直接受唔到呢個事實，成個人呆了，我不斷問神，點解神唔保守我。返到村中成個人變得消極、暴躁、時常埋怨，而且心想一走了之，把餘下的日子盡情去耍樂。但係村中一班導師同埋要好的弟兄不斷為我祈禱、開解我，使我有勇氣繼續去面將要過的日子。當自己在村裏生活接近9個月的時候，終於等到審訊的日子來臨，案件連續審了六日，到最後一天的時候，法官禁止我地一干人等保釋，要我地關到懲教署裏提取一份為期十四日的報告。當時聽到呢個判決自己冇驚慌，而且在呢十四日裏得到意外的平安，在呢D日子，我將一切的事交託比神，因為我記得聖經上的一句金句：「你聽見我的禱告，看見我的眼淚，你必醫治我。」就係呢句金句，使我渡過呢十四日的生活。當判刑那日，很多懲教署職員都對自己說判監的機會很高，而外出的機會真係微乎其微。但係判刑的結果真係令到我看得見神的大能，由起初的販運毒品罪名改判為藏毒罪；更由原先的幾年監獄生活都改了為守感化令，這更令我深深體會到神的恩典。在呢年半期間，自己同屋企人的相處同溝通都比以前好了好多，自己的性格比入村之前更溫和。而家自己已經畢業了，而且也留低在村中事奉，藉此將自己未完全的行為去改變得更完備。

記：有冇說話可以勉勵時下的青年人？
S ：毒品真係唔好試，食毒品會淪落街頭、家庭破裂、而且只有酒肉朋友，冇知心良朋。